書名:大樹的辦桌
作者:梁明輝

梁明輝,1956年生,高雄市大樹區久堂里人,曾獲2005年台灣史蹟源流會歷史論文徵選第一名、2008年教育部臺語詩社會組徵選第一名,以及,第三屆鄭福田生態文學獎臺語詩組優選獎、第二屆臺南文學獎臺語散文佳作,並自2011年起連續三年榮獲打狗鳯邑文學獎臺語新詩優選獎。著作有詩集《獨攀之歌》、《打狗神話的花蕊》,以及地方史著作《千尋萬年溪》〈第一章/阿猴的古溪與舊岸〉、《打狗社最後的身影》等。

184_大樹的辦桌.jpg 

自序〈故鄉的滋味〉

故鄉,是一條情歌,從古以來像母親、像愛人仔按咧,予人開喙開唱,牽出心聲。

故鄉,佇咱的心目中,那老那媠,那久那芳,無論一百、抑是一千年、也永遠美麗,永遠芬芳。

親像一叢老樹,攏是歲月層疊的痕跡,不管是縐紋,抑是傷痕的添加,猶閣有孤不二衷代誌拄著的生瘤、漚空。這一切、一切留落來的記號,疊著猶閣當咧發生的變化,佇故鄉身軀頂,顛倒若像歷史咧出青仝款,攏總充滿春天的活力。

所以,阮今仔日欲共故鄉即叢老樹,披紅綢、敬杯水、點香祝禱。共逐个人講,故鄉佇古早的年代,按怎用山、用溪的身軀,像抱卵仝款,共咱的庄頭孵出來。按怎佇即塊土肉頂,平常時仔,佮咱做伙流汗趁食,拄著做鬧熱,閣按怎佮咱鬥陣辦桌食腥臊。

徛佇土地,世代奉獻性命,若講即塊土地是桌面,咱逐个人佇遮生活,叨是桌頂的飯菜,隨人一碗盤,好料好食,家己款、家己撨。土地的面頂,uê人一碗一碗便菜飯,uê人一盤一盤好手路,有紅、有黃、有青、有綠、有白……,有甜、有鹹、有酸、有苦、有薟……,用色佮味,組成一桌故鄉的菜路。

即桌,毋管是土、是石、是沙、是水、是風、是雨、是煙、是塵……,我欲共筆尖當做舌,啖看故鄉的滋味,我欲描出傳送氣味的線條,寫出故鄉的山佮溪。

即桌,不管是王梨、西瓜、龍眼、荔枝、竹筍、茄仔、苦瓜……,我欲用墨水做喙瀾,溶入來故鄉的湯汁,𪐞踮紙面,彩出故鄉農產的色緻。

即桌,毋插是豉的、發的、煮的、糋的……,抑是粿仔、米粉、煙腸、礤冰……,我欲掀開紙簿仔當做甕、當做鼎鍋仔,共故鄉的原料,下落時間佮溫度中變化,用筆劃lueh抐、lueh摵、lueh罟,製造出故鄉的酸甘佮芳氣。

即桌,無論是嘴瀾、是汗滴、是目屎、是流血,抑是天地山水的𪐞色,我的字句行逝,借著傳說排列,坐著神話飛行,佇廟埕、佇樹跤,一攤一攤集做市仔,熗出故鄉的滋味,親像風送著一群白鴒鷥仝款,放予故鄉的篇章佮雲做伙飛。

人對即塊土地,深藏的意識,叨是家己對阿母討食食的記持,開始用喙、用奶喙仔,尾仔湯匙改用箸。但是箸,嘛毋是對故鄉,最後啖看啥款味的器具,顛倒統尾是規身人,用目睭佮耳空佇庄頭中浸染,用皮肉佮心腦佇文化內洗浴。像阮,家己也毋捌想過有即工,會共筆當做指北針,予故鄉吸引,踏步去揣滋味。

歷史像刀,佇歲月中雕刻故鄉的形體。神話、傳說像神經線,湠出故鄉,佇天地充滿感動。即款看會著的視覺、摸會著的觸感佮食、鼻會著味感,佇世代的進行中相疊。一層縐紋,一層傷痕,閣加一緣氣味,像山懸懸低低,像溪彎彎越越,也親像季節,春夏秋冬發出無的光彩佮光影。到統尾仔,這一切攏歹分,因為一痕一跡,攏是幾若世代人,佇土地的皮肉頂,美麗刺花,化做故鄉的符號。

即種符號,佇大地之上,轉遨著祖先的故事,親像年輪箍踅,終其尾,變做故鄉的酒窟仔,文文仔對咱笑,充滿溫暖佮鼓勵。即款笑容,親像水窟出活泉,不時濆泡仔,清清透透,汰洗著咱的性命。即款對人生的樂暢,像一碗燒湯,若一杯甜酒,親像故鄉咧辦喜宴,激出咱跳動的心臟,予咱即世人無停拍拚,使出力頭乾杯,向故鄉敬酒。

本書榮獲高雄市政府文化局書寫高雄出版獎助 / 高雄市政府文化局2014 書寫高雄創作獎助計畫

春暉出版 978-986-5798-69-7 (平裝)
定價:200元
地址:高雄市苓雅區正義路3巷8號
電話: (07)7491497.(07)7613385
傳真: (07)7493138.(07)7238590
郵撥: 04062209 陳坤崙帳戶

創作者介紹

春暉出版社 Chun-Hui Publish

春暉出版社 發表在 痞客邦 PIXNET 留言(0) 人氣()